ركن المرأة شبـــــــاب على طــــــول ابتسامــــــــات جرائد وصحف

السبت، أغسطس 14

سندريلا


طبعا كلكم عارفين قصه سندريلا اصلى انا بحبها قوى

وحابه كمان تقرها منى وعلى طريقتى

نبتدى بقى واقوووووووووول

كان ياما كاااان

كان في بنوتة رقيقة وقمورة اسمها سندريلا الحبوبة

ليها طباع جميلة  ورثتها واتعلمتها من ام غايه في الطيبة والاخلاق

واخذت جمال روح مامتها اللي اتوفت

كان ليها اب طيب حنون اتجوز مرة تانية من ست يا ساتر يارب

علي طباعها ست شرسه كانت معاها بنتين

مكنوش فى جمال سندريلا بس هما كانوا

نسخة من مامتهم فى طبعها الوحشه

طبعا مع طباعهم الشرسة حصلهم غيرة من جمال سندريلا

وابتدت الام وبناتها يستغلوها في تنضيف البيت وخدمتهم

لكن البنوتة كانت حبوبه ومن كل كائنات الكون محبوبة

لكن المسكينة حتي باباها مقدرش يعارض مراته لانها كانت غنية

وهي اللي بتصرف علي البيت فكان بيشترك معاهم

ويقسى علي بنته سندريلا

وفي يوم خبط الباب وجه مرسال وفي ايده رسالة  دعوة من الامير مكتوب فيها

 انه عامل حفلة كبيرة

وان سعيدة الحظ اللي هتخطف قلبه هتصبح هي الاميرة

طبعا الدعوة جت على هوي الاختين وابتدوا يفكروا  ويحكموا علي المسكينة

انها تختار بذوقها اللي يليق عليهم ويحليهم 

 وبطيب خاطر اختارت بحب اجمل حاجة يلبسوها

وكمان عرضت عليهم تعملهم احلي تسريحة

وهي بتزوقهم سالوها بخبث ومكر

ايه رايك يا سندريلا تيجي الحفلة معانا ؟

ردت المسكينة: انتوا بتتريقوا عليا هو انا اقدر اروح حفلة زي دية

مسكتها مرات ابوها الشريرة وقالت

هو معقول تروح حفل كبيرة بهدومها القديمة بعد ما زوقتهم

وودعتهم بدموع في عينها

واحلام القصروالحفله جواها بتنده عليها قعدت تبكى سندريلا

لكن دموع السندريلا اثرت في الساحرة الطيبة

وطبطبت عليها بحنان وقالت لها  نفسك تحضري الحفلة

ردت سندريلا و الدموع فى عينها  نفسي.. نفسي

قالتها الساحرة طيب روح هاتيلي من الجنينة حباية قرع

وفعلا سمعت سندريلا الكلام

وجابت احلي حباية قرع

وحولت الساحرة حبايه القرع الى عربية غايه فى الرووعه

وحولت عدد من الفيران والسحالي بعصاها السحرية

لخدم وحشم وخيول يجروها

وبضربة واحده من العصا السحرية

حولت الساحرة سندريلا لاجمل حورية

واشترطت علي السندريلا مع دقات منتصف الليل

لازم تسيب الحفلة وترجع في غمضة عين

لانها لو قعدت دقيقة زيادة كل حاجة هتعود لاصلها

هترجع لفستانها البسيط

والعربية لحبة القرع والخيل للفيران

والخدم للساحالي

ووعدتها سندريلا انها هتسيب الحفلة وقت الميعاد تمام

وركبت الاميرة العربيه

واول ما وصلت القصرلمحها الامير

اتخطف قلبه بسحرها

وهوكمان خلي اوتار قلبها تتاثر بسحر نظرته ليها

وطبعا الكل بقي يقول مين تطلع الجميلة دى

والغيرة اكلت الاختين اللي قلوبهم شريرة

واتقدم الامير وانحني ليها

ومسك ايدها الجميلة  ورقص معاها علي نغم الالحان

واخدها معاه لعالم كله سحر وخيال

وفجاه

سمعت سندريلا وهي في دنيا الخيال دقات الساعة 12

وجريت من الامير ومن لخبطتها وقعت منها فردة جزمتها

وحزن الامير وفضل يدور علي الاميرة

وامر الحراس انه يدورعن صاحبة الجزمه

لف الحراس علي بنات البلد لكن الجزمه كانت اصغر من اي مقاس

ووصل الحارس لبيت سندريلا

استقبلوه الثلاثي المرح طبعا عارفين مين هما

الثلاثى المرح

مرات الاب والبنتين طبعا

مكانش ينفع تكون الرجل علي اد المقاس

وسال الحارس لو فيه حد تاني موجود معاهم

قالوا فيه بنت غلبانة

مش ممكن يكون على قدها

اصر الحارس لانها اوامر من الامير ان الكل لازم يجرب المقاس

وندهوا عليها بلهجة فيها ضحك وتريقة

وجرب الحارس الجزمه اللي جات طبعا علي مقاس السندريلا تمام

وراحت لبست الفردة التانية كمان

وبضربة سحرية من الساحرة الطيبة اتحولت البنوتة

لاجمل عروسة  واتعرفوا عليها الاختين وطلبوا منها تسامحهم

قربت منهم السندريلا بقلبها الحنون

وقالتلهم انها بتحبهم ومن جوة القلب مسامحاهم

واتقابلت السندريلا مع الامير وكانت في عنيه اجمل الجميلات

وخطفها على حصانه الابيض

علشان يبتدوا حياة تجمع بينهم وتكون سعيدة

دي قصة جميلة من ايام الزمن الجميل

علشان تعلمنا ازاي الرضا والتواضع والخدمة بمحبة

بتحول الالم لفرح وازاي ربنا بيكافيء في النهاية

كل مظلوم




 
وتوته توته ... خلصت الحدوته ... حلوه ولا منتوته

انتظرونى فى حكايه جديده

اكيييد ح تعجبكم


تصبحوااااااااا على خيررررررر



29 التعليقات:

أتنين حبيبين يقول...

صباح الخير يا ماما

وحشتينى كتير اوى اوى خالص مالص

أتنين حبيبين يقول...

هييييييييييييييييييه

انا اول تعليق
هييييييييييييييييه
أنا عاوزه شكولاته بقا مليش دعوه

عااااااااااااااااااااااا

أتنين حبيبين يقول...

كميله كميله اوى يا ماما
زوقك يجنن انا بعشق سندريلا اوى
للدرجة كبيره
نفسى حسام يعمل كده معايا زى ما الامير عمل معاها
بتخيل نفسى مكانها بكل قصصها

الله الحب جميل اوى ياماما صوح

هههههههههههههه
تصبحى على خير

محمود(باحث عن حب) يقول...

iiهههههههههههههه
قصه حلوة والله يا مرمر
بس فى سؤال ملح عندى
من اول ما سمعتها وشفتها
هو مصير الاختين ايهخ تلوقتى
وصلوا لفين
وباباها لو كان عايش
رح فين ده سؤال ملح
طبعا
لو كان الطفل اللى بيسمع القصه دى اسئلته غلسه زى كده
انتى عمرك ما هتحكيله حاجه ابدا
هههههههه
تصبحى على خير
فين ابتسامات
سايباها ليه بس
كده

داليـ ـ ـ ـ ـ ـ ــــا يقول...

شوقينا بقه
دى بقه حكايه خياليه أوى لأن معتش فى أمراء بيفكروا بالشكل ده
كل أمير الوقتى أأقصد راجل
بيدور على الجمال
والفلوس
والوظيفه
ولو مكنتش البنت فيها كل ده خليها بقه جنب امها

تحياتى

فتافيت يقول...

انا بحب القصة ديه اوي يا مرمر بجد
وبطريقتك بجد روووووووعة
تسلم ايديك يا قمر

:) صباحك فل

مصطفى يقول...

مدونة جميلة يامرمر ..

رمضان كريم.

mrmr يقول...

توتا
صباح الجمال والهناااااا
انتى كمان وحشتينى يا جميل خالص مالص مالص

ليكى عليا الحدوته الجايه اجبلك شيكولاته معايا ومش كده وبس ومصاصه كمان يا قمر

ربنا يديكى يا غاليه وتفرحى انت وحسام ويخطفك على الحصان
بس دلوقتى مش فيه حد بيخطف على الحصان
بيخطفها على الزلمكه
هههههههه

تصبحى على خير يا اجمل توتا

mrmr يقول...

محمود
منور باسئلتك دى
لو الطفل سئل الاسئله دى متخفش مش ح ابطل احكى لالالا
ح ارميه من البلكونه
هههههههه
بس متشغلش بالك بالاختين هنااء وشرين دووول انا خلاص جوزتهم وباباهم الله يرحمه
ههههههههه

بالنسبه لابتسامات حاضر من عنيا قريب جدا ح اجيبلك مجموعه جميله ح تفطسك من الضحك

تصبح على خير
وربنا يسعدك

mrmr يقول...

داليا
برضه تجيبى ايام زمااااان لدلوقتى
طبعا يا حبى الراجل دلوقتى حتى الجمال اخر حاجه بيفكر فيها المهم انها تكون موظفه ومعاها فلوس علشان تساعد فى المعيشه
ربنا يكون فى العون ويساعد عبيده

نورتى يا جميل

mrmr يقول...

فتافيت السكر هانم

انتى الاجمل يا غاليتى

وجودك ده شرف لمدونتى نورتينى ويارب تنورينى ديما

تصبحى على خير يا قمر

mrmr يقول...

مصطفى

اهلا بيك
زيارتك الاجمل يا مصطفى

الله اكرم

ربنا يسعدك ويحافظ عليك

أحمد الصعيدي يقول...

بس يا ستي


وبعدين مسرور بتاع شهريار هيقوم ياخد رقبتك علشان كدة بلاش حواديت



السلام عليكم

ازيك يا مرمر معلش من القرف والله

استحمليني احنا صعادة زي بعض

اسعدك الله

mrmr يقول...

اهلا يا احمد يا شاعر الصعيد والعاشقين

وهنا ادرك شهريار الصباح فسكتت عن الكلام المباح
ومسرور مش يقدر يقطع رقبتهاعلشان لسه باقى القصه

ولا يهمك نستحمل بعض وماله احنا جيران وولاد بلوجر واحد

كل سنه وانت طيب
رمضان كريم

الحب الجميل يقول...

قريتها وداخله أنام بقا
دى من الحكايات اللى بحبها كتير
تصبحى على خير يا مرموره مع حكايه جديده وجميله زيك
تصبحى على خيرررررررر

mrmr يقول...

حبى

وانت من اهل الخير

احلام سعيده

ورمضان كريم

طوبه فضه وطوبه دهب يقول...

حدوته جميله وملتوته كل سنه وانتى طيبه يا قطقوطه

mrmr يقول...

طوبه فضه وطوبه دهب
انتى الاجمل يا قمر
وامنياتى بتزيد جمال بوجودك
ربنا يسعدك
كل سنه وانت طيبه
رمضان كريم

شمس النهار يقول...

ماشاء الله

مدوناتك كلها لطيفة

:))

سلسبيل يقول...

جميلة أوووووى
القصة دى أنا بحبها
خالص زيك يا أحلى مرمر
كل سنة و انتى طيبة حبيبتى
رمضان كريم

mrmr يقول...

شمس النهار

انتى ياقمر اللى لطيفه

اسعدنى جدا مرورك على ابتسامات وشباب على طول
وانا انتهز الفرصه وادعوكى لزياره ركن المراه ومكتبه الفيديو
اكيد ح تستفادى كتير منهم

ربنا يكمل شفاكى على خير

نورتى يا جميل

mrmr يقول...

سلسبيل

سندريللا من اجمل القصص على قلبى بحبها قووووى
علشان كده كنت حابه تقروا القصه بطريقتى
انت الاجمل يا قمر
ربنا يسعدك ويفرح قلبك

Haytham Alsayes يقول...

كل عام وانتي طيبة

mrmr يقول...

Haytham Alsayes

شكرا لزيارتك

كل يوم وحضرتك طيب

رمضان كريم

اقصوصه يقول...

جميل جدا سردك للقصه

مبارك عليكم الشهر

وكل عام وانتم بخير

mrmr يقول...

اقصوصه
كل سنه وانت اجمل اقصوصه

ربنا يفرح قلبك

يوميات رجل مش عايز يجوز يقول...

كل سنة وانتى طيبة

ياة على القصة الجميلة دى

الحب اجمل احساس فى الدنيا وبيخلى الانسان يعمل العجايب

الف شكر على زيارتك الجميلة

تحياتى

mrmr يقول...

يوميات رجل مش عايز يتجوز

اهلا بيك نورت امنياتى

ربنا يسعدك ويحافظ عليك

هديل الحمام يقول...

ما شاء الله

أسلوبك في القصص يجنن ^_^

مسكت الخشب ×_×

تسلم أناملكـ يا ورده

أستمتع جداً لما اقرألك

كل الوِد ~

دعــــــوة للضحك من القلب

دعوة للضحك من القلب
اضف هذا الكود الى مدونتك ليظهر عندك رابط مدونة أبتسامات بهذا الشكل